Tinnan

2006-06-29T17:39:00.000Z

Er búin að eyða töluverðum tíma af sumarfríinu í að skoða útlandaferðir, panta til Köben og Tenerife - hvað getur maður annað í rigningunni sem ákvað að setjast að hérna á skerinu. Komst að því að það er ekkert ofsalega skemmtilegt að sökkva sér í sólarlandaferðir þegar það er ekki á dagskránni að fara í eina slíka fyrr en eftir hálft ár eða svo og þó svo ég sé nú dugleg að byrja snemma að hlakka til þá er hálft ár svona í það mesta, svo að ég tali nú ekki um í rigningunni endalausu.

Ég er komin með plön fyrir eina helgi í haust, þessi eina helgi er afmælishelgin mín um miðjan september þegar ég ætla að bregða mér til Köben. Í haust kemur Nick Cave til landsins og heldur tónleika sem ég ætlaði að fara á alveg þar til klukkan 10 í morgun þegar miðasalan hófst. Komst þá að því að tónleikarnir eru auðvitað þessa einu helgi sem ég hafði ráðstafað, sem er svo týpískt að ég varð ekki einu sinni pirruð. Það hefðu ekki verið amaleg afmælisplön að smella sér í höllina en ég verð svo sem að öllum líkindum með bjór í hendi á e-u öldurhúsinu í kóngsins köben svo þetta er nú allt saman ásættanlegt :) Eftir að ég sá svo að bæði Wolf Parade og Islands spila á airwaves þá hef ég ákveðið að svekkja mig sem allra minnst yfir því að missa af tónleikum því ef ég næ að sjá þessi tvö bönd þá verð ég mjög sátt.

Jæja, farin í sveitina.

2006-06-06T18:34:00.000Z

Síðustu vikur hef ég hugsað óvenjumikið um pólitík, um stöðu mína og hugsjónir gagnvart öðrum. Finnst það nefnilega alveg ótrúlega furðulegt að ég geti verið ósammála helmingi þjóðarinnar og þar af mörgum af mínum bestu vinum í þeim málum sem mér finnst hvað mikilvægust. Hvernig má það vera að allt þetta fólk styðji einkavæðingu, vitandi það að hún stuðlar í mörgum tilfellum að því að bilið milli þeirra sem eiga mest og þeirra sem eiga minnst eykst. Er allt þetta fólk tilbúið að styðja Íraksstríðið og enn fremur tilbúið að styðja það að tveir menn ákveði það hvort þjóðin styðji stríð eða ekki. Síðast en ekki síst er allt þetta fólk tilbúið að samþykkja og styðja skammsýnina og þröngsýnina sem einkennir þessa blessuðu stóriðjustefnu - ekki erum við í alvörunni svo hugmyndasnauð og einsýn öll með tölu sem búum hér á skerinu að álver sé okkar eina lífæð.

Þetta eru þeir punktar sem mér persónulega finnst mikilvægastir og neita að trúa að allir þeir sem kusu annan flokk en ég séu mér ósammála - eitthvað hlýtur forgangsröðin að vera mismunandi. Allavegana vill maður alltaf halda að maður hafi rétt fyrir sér :)

En nóg af því...

Fannst sumarið loksins vera komið núna um helgina, sá hálf eftir því að hafa ekki drifið mig á Reykjavík Trópík en fór í staðinn út úr bænum, rölti Laugarveginn og borðaði grillmat svo ég er nokkuð sátt. Sé svo fram á djamm og jafnvel útilegu næstu helgi svo það er komið sumar hjá mér hvort sem veðrið fylgir mér eða ekki :)

2006-05-23T22:27:00.000Z

Ég er búin í prófum og því miður virðist það haldast í hendur við það að góða veðrið sé á þrotum. Langþráð frí og veikindi, passar það ekki alveg örugglega, hmmm. En jæja ég er allavegana í óðaönn við að láta mér batna svo maður geti kannsi lyft sér örlítið upp um helgina, þó ekki væri nema til að ná að fylgjast vakandi með kosningunum. Nú þegar hafa samfylkingin, framsókn og sjálfstæðismenn haft samband við mig símleiðis, jújú ég er greinilega mjög mikilvægt atkvæði. Ég er farin að hallast að því mitt atkvæði hafi verið sett á útsölu, allavegana hljóta þeir að vera fiska eftir því að það sé miklu auðveldara að fá mig til að kjósa sig þar sem ég hef enga gríðarlega kosningareynslu og sé því líkt og óskrifað blað - með engar hugsjónir. Til allrar hamingju er það allskostar rangt. Auk þess virka þessar símhringingar alveg öfugt á mig, ég vil getað skoðað mína kosti þegar mér hentar og ef mig langar til - það er bara svo einfalt.

Hvurslags sjálfspíningarhvöt er það hjá manni að finna sér alltaf e-ð nýtt og nýtt til að hafa áhyggjur af? Ég var ekki fyrr búin í prófum en ég fór að hafa áhyggjur af gengi mínu í prófunum, tannlæknaferðum, sektum á bókasafnsbókum og ég veit ekki hvað og hvað - hvað varð eiginlega um áhyggjuleysi? Ég er að hugsa um að henda því í bunkann sem geymir "það sem ég ætla að gera í sumar", hljómar strax eins og titill á barnabók - Tinna temur sér áhyggjuleysi.

2006-05-14T12:33:00.000Z

Alveg er það magnað hvað maður getur lært mikið án þess að það skili sér í góðu gengi á prófum, magnað en um leið svolítið svekkjandi - örlítið.

Engu að síður þá mun og opna bjór og hækka í Baba O'Riley eftir um það bil 30 klukkustundir, burtséð frá öllu öðru. Já og skipuleggja mín mjög svo háleitu markmið um sumarfrí - set markið á þrjár útilegur þetta árið.

2006-04-16T15:12:00.000Z

Ef þetta er ekki góð afþreying eina daginn sem maður á í sumarfrí þá veit ég ekki hvað....

http://www.youtube.com/watch?v=Gi2CfuqcUGE

...hooka hooka ooka chakka

2006-03-31T13:07:00.000Z

Ég fór í búðir síðustu helgi, réttara sagt Smáralindina svona til að vera nákvæm. Þetta væri auðvitað ekki frásögur færandi nema hvað ég fann mér flík sem mig vantaði auðvitað alveg bráðnauðsynlega. Í þetta skiptið var það lítill rauður kjóll með litlum hvítum miða líkt og flestar allar mínar flíkur, nema hvað á þessum stendur large! Þar sem eina flíkin sem ég man eftir að hafa átt í stærðinni large er íþróttabolur í barnastærð þá stóð mér augljóslega ekki alveg á sama um þessa stærðarbreytingu, reyndi samt að láta það lítið á mig fá - hreyfingin hefur jú verið í sögulegu lágmarki þennan veturinn.

Í dag að loknum skóla fór ég heim og fékk mér að borða eins og venjulega, las blaðið og sá mynd af kjólnum mínum. Hélt ég myndi seint segja það en svei mér þá hvað ég var ánægð að ég passaði í large - a.m.k. þegar maður kemst að því kjóllinn er auglýstur sem fermingarkjóll.

2006-03-19T10:11:00.001Z

Jæja nú verður það annaðhvort stærðfræðigreining eða formúla, spennandi að vita hvort hefur yfirhöndina.

__________________________________
...klukkutíma seinna:

Með kókosflögur og kaffibolla að vopni að ógleymdum Matmos á fóninum og dreitil af samviskubiti vegna leti gærdagsins þá vinnur greiningin sannfærandi sigur. Næsta barátta verður háð gegn Sex and the City en þar gæti ég trúað að greiningin ætti erfitt uppdráttar.

2006-03-18T17:40:00.000Z

Það er langt síðan ég ákvað að fara í vísindaferð föstudaginn 17. mars. Einhverra hluta vegna hafa þessar ótalmörgu vísindaferðir sem við Áslaug ætluðum að fara í horfið fyrir lítið. Það var þess vegna mikilvægt að ákveða þessa með miklum fyrirvara þar sem helgin þurfti að vera bæði tilrauna- og skýrslulaus. Eins og gefur að skilja vorum við ekkert að gera kröfur um það hvert okkur langaði í vísindaferð, enda höfum við ekkert um það segja og jafnvel að það skipti okkur ekki svo miklu máli. Nema hvað ég hafði reyndar minnst á það fyrir ekki svo löngu að mig langaði ósköpin öll lítið að fara í Alcan, álverið í Straumsvík en vissi að þangað ætti að fara e-n tímann á önninni. Auðvitað var svo ferðinni heitið í Alcan þann 17. mars og við með. Í stuttu máli sagt þá fór kynningin í álverinu langt fram úr mínum björtustu, enginn áróður þar á ferð eins og ég hafði svo sterklega búist við og sá sem sá um kynninguna svaraði mörgum krefjandi spurningum af fullri hreinskilni og virðingu fyrir öllum skoðunum. Hann eyddi meira að segja dágóðum tíma í að útskýra hvað sér fyndist leiðinlegt að þeir sem ynnu hjá stofnun sem þessari væru flokkaðir í ál-liðið sem vildi álver á hverja þúfu því sú væri auðvitað ekki raunin. Þetta minnti mann aðeins á að dæma ekki fyrirfram heldur reyna að vera jákvæð og opin fyrir öllu - þó með varfærni auðvitað.

Svo var það bara bjór og rauðvín... sem var reyndar ekki síður áhugavert.

2006-03-11T14:57:00.000Z

Í tvo daga fullyrti ég að ég færi á Hróarskeldu þetta árið ef Bob dylan spilaði þar. Á þriðja deginum var koma hans staðfest en núna er ég ekki alveg viss hvort ég ætli. Það er mun gáfulegra að vera heima og safna pening. Hversu leiðinlegt er að vera gáfulegur?

Allavegana undir venjulegum kringumstæðum færi ég alveg bókað en þar sem ég er búin að sækja um íbúð á görðum og er ekki númer 230 eins og síðast þegar ég sótti um heldur númer 27 þá er þetta allt saman svona á mörkunum.

Ætli það sé ekki upplagt að láta fylgja með my all time favourites með meistara Dylan:

5. It ain't me, Babe
4. Like a rolling stone
3. Shelter from the storm
2. Knocking on heavens door
1. Don't think twice, it's alright

2006-03-03T18:19:00.000Z

Hvað er betra en að reikna stærðfræðigreiningu á föstudagskvöldi? Tjah, maður spyr sig. Það svo sem getur vel verið að maður hætti snemma og gluggi í glænýju múmínálfabókina sem ég splæsti í um daginn - Vetrarundur í Múmíndagl, nú eða bara horfi á Lost.

Ég er strax farin að hlakka til sumarsins svo þessi veðurbreyting síðustu daga er engan veginn að falla í kramið. Svona rétt til að minna mig á að mig langi ógurlega mikið í sumar en svo nei, bara djók - fáum 7 stiga frost í staðinn. Annars byrjar sumarfríið 15. maí eða þ.e.a.s. síðasta prófið er 15. maí svo þetta er svo sem engin eilífð. Ég held að Eurovision djammið verði tekið með trompi.

2006-02-28T15:24:00.000Z

Betra seint en aldrei minnir mig.

4 störf sem ég hef unnið við:

Útivinna hjá Landsvirkun
Afgreiðslustelpa hjá Oddi bakara
Skúringar í Fossvogsskóla
Bókhald hjá Landsneti

4 bíómyndir sem ég gæti horft á aftur og aftur:

La vita e bella (Life is beautiful)
High Fidelity
Lord of the rings
Home alone 1

4 staðir sem ég hef búið á:

Melgerði 9
Hulduland 7 ...og þá er það upptalið

4 sjónvarpsþættir sem mér líkar:

Lost
Desperate Housewifes
O.C.
Family Guy

4 staðir sem ég hef heimsótt í fríum:

Grænland - Kulusuk
Spánn - Alicante
Þýskaland - Berlín
Danmörk - Kaupmannahöfn/Óðinsvé

4 heimasíður sem ég skoða daglega fyrir utan blogg:

Hi.is
mbl.is
visir.is
...vóó ég skoða bara blogg :)

4 bækur sem ég les oft:

Þriðjudagar með Morrie
Börnin í Ólátagarði
Ljóðasafn Einars Ben.
University Physics og fleiri góðar...

2006-02-26T11:31:00.000Z

Jæja loksins loksins gafst ég upp á blog.central draslinu... enda gat ég ekki lengur birt bloggin mín hjá Hinriki. Ég á að vísu ennþá eftir að setja inn tengla og fleira sem mun vonandi koma með tíð og tíma svo múmínálfarnir verða að duga í bili.